តារាសម្ដែងសិង្ហបុរី៣រូបគឺកញ្ញា Jeannette Aw, Tay Ping Hui និង
Elvin Ng បានមកដល់កម្ពុជាតាំងពីព្រឹកម៉ោង១០ថ្ងៃទី១៣ សីហា ២០១៤។
នៅព្រឹកម៉ោង ១០:០០ កាលពីថ្ងៃអាទិត្យ
ពួកគេបានត្រឡប់ទៅប្រទេសកំណើតពួកគេវិញហើយ។ នេះបើតាមប្រភពពី
MyTV ភាគីដែលរៀបចំដំណើររបស់ពួកគេមកកម្ពុជា។
យ៉ាងណានៅមុនពេលត្រឡប់ទៅប្រទេសកំណើតពួកគេវិញ
តារាសម្ដែងសិង្ហបុរីទាំង៣ដួងបានធ្វើសកម្មភាពមួយចំនួន
ក្នុងនោះក៏មានសកម្មភាពសប្បុរសធម៌ផង។
ពួកគេបានធ្វើសន្និសីទផ្សព្វផ្សាយពីភាពយន្ត “ព្យុះបាល់ក្រោមជើង”
នៅថ្ងៃទី ១៤ សីហា ២០១៤។ លុះថ្ងៃទី១៥ ខែឆ្នាំដដែល
ពួកគេទៅបង្ហាញខ្លួននៅផ្សារទំនើប AEON Mall
ដោយទទួលបានការគាំទ្រយ៉ាងច្រើន។
សកម្មភាពឡើងកម្មវិធី
“រាត្រីកម្សាន្ត” របស់ទូរទស្សន៍ CTN
គឺជាសកម្មភាពចុងក្រោយរបស់ពួកគេ។ ប៉ុន្តែមុនដល់កម្មវិធីនេះ
Jeannette Aw, Tay Ping Hui និង Elvin Ng បានចុះទស្សនកិច្ច
និងចែកអំណោយជូនដល់កុមារនៅអង្គការភាពញញឹមនៃកុមារ។
រសៀលថ្ងៃទី១៦ ដដែល តារាសម្ដែងល្បីឈ្មោះទាំង៣ដួងរបស់សិង្ហបុរី
បានទៅជួបជុំអ្នកគាំទ្រនៅភោជនីយដ្ឋាន Mango។
